Views: 10
di Ferdinando Russo
Sott’a cierte albere,
vicino ô mare,
chill’uocchie d’oro,
chill’uocchie rare,
l’aggio guardate,
l’aggio cantate,
l’aggio vasate,
l’aggio pittate
dint’a stu core..
.
E cuntemplannule,
me so’ mpazzuto,
me so’ perduto..
Essa parlava
e me ‘ngannava !
Anne che passano,
capille janche…
Quanta tristezza !
Chi m’accarezza ?
.
Suonne che restano,
spine pugnente,
smanie ca accidono,
ca m’avvelenano,
pecchè ? Pe niente !
Mane strignute,
manelle amate
ca hanno scippato
‘a dint’’o pietto
st’anema mia !
Lettere scritte,
tutte ‘mparate !
.
Nomme strillato
pe mmiezo ‘a via..
Freva ‘e pazzia..
Cielo che strazio,
che cose amare !
N’abbaglio ‘e vista,
nu velo ‘e lacreme,
nu schianto acuto
Suonno perduto.
.
Mamma che guarda
stu figlio sujo
ca nun ‘a parla
ca nun ‘a vasa,
ca va p’’a casa
senza guardarla,
senza risponnere
pe nun ‘a nfonnere
cu tutt’’e llacreme
ca tene ‘ncore..
.
St’ata nuttata
pure è passata..
E accussì veneno
ll’ore, ‘e minute,
‘e juorne ‘e ll’anno..
E ‘ morte, quanno ??